Македонски судии ќе делат правда на Медитеранските игри во Италија, каде четворица наши арбитри добија ангажмани на меѓународната сцена.
Како меѓународни асистент-судии правдата ја делат искусната Елена Соклевска Илиевски и Тамара Цветановиќ, додека Ангелчо Ристов е ангажиран како главен судија со статус на национален судија, а Александар Николоски како асистент судија со статус на национален судија, се работи за перспективни судии.
Македонските арбитри веќе имаа свој ангажман на турнирот. Вчера, Мариа Марота од Италија беше главен судија на натпреварот меѓу женските репрезентации до 17 години на Словенија и Мароко, додека Соклевска Илиевски и Цветановиќ беа асистент-судии, а Ристов ја имаше улогата на четврти судија. На овој натпревар Мароко славеше убедливо со 4:0.
Нови предизвици за македонските арбитри следуваат и вечерва.
Од 21:00 часот, на натпреварот меѓу женските репрезентации до 19 години на Италија и Косово, главен судија ќе биде Крешник Ѓапи од Албанија, додека македонските претставнички Елена Соклевска Илиевски и Тамара Цветановиќ ќе бидат негови асистенти. Четврти судија ќе биде Италијанката Мариа Марота.
Во истиот термин, нов ангажман ќе има и Александар Николоски, кој ќе биде асистент-судија на дуелот меѓу женските селекции до 19 години на Португалија и Мароко.
Присуството на четворицата македонски арбитри на Медитеранските игри е уште едно значајно признание за македонското судење и доказ дека нашите судии добиваат доверба и на големи меѓународни натпреварувања.
