Кошаркарскиот клуб Пелистер ги стартуваше подготовките за новата натпреварувачка сезона 2026/27, во која битолскиот тим влегува со изменета структура и нова визија за развој.
Екипата во новата сезона ќе ја предводи искусниот тренер Тане Спасев, кој се обврза на едногодишна соработка со клубот. Негов прв асистент ќе биде Владимир Николовски, со што Пелистер го задржува континуитетот во стручната работа.
На првиот собир беа присутни сите нови засилувања, освен американските кошаркари, кои во Битола се очекува да пристигнат од понеделник. Во почетната фаза од подготовките тимот ќе работи со домашни спаринг-партнери, а ќе има и настап на Меморијалниот турнир „Зоран Петковски – Петкото“.
Турнирот ќе се одржи на 16 и 17 септември во спортската сала „Боро Чурлевски“ во Битола, како дел од подготовките за новата сезона.
