Женската одбојкарска репрезентација на Македонија до 20 години со пораз ги започна БВА зонските квалификации за Европското првенство 2027, откако во Мостар загуби од Романија со 0:3 (17:25, 20:25, 16:25) во рамките на групата А.
Македонија имаше одличен почеток на натпреварот и беше израмнета со Романија до 9:9. Сепак, следуваше серија од 0:5 за противникот, кој со подобар сервис и благодарение на неколкуте технички грешки и проблемите во приемот на македонските одбојкарки стигна до 13:20, а потоа и до освојување на првиот сет со 17:25.
Во вториот сет Македонија повторно имаше негатива на почетокот (4:7), но во продолжението одигра многу подобро. Со серија стигна до 13:13, а потоа успеа и да поведе со 18:17. Романија, сепак, повторно го подигна нивото на игра, особено на сервис, и со 20:25 го освои и вториот сет за водство од 0:2.
Во третиот сет Романките ја презедоа иницијативата, но Македонија не се предаваше и успеваше да остане во игра при 10:13 и 14:16. Во завршницата противникот беше посигурен и со 16:25 стигна до конечни 0:3.
Македонија денес ќе го одигра вториот натпревар од квалификациите, а противник ќе биде Белорусија. Дуелот е закажан за 14:30 часот.
