Бранителот на трофејот на турнирот „Крсте Андоновски“, Охрид, со победа го започна настапот на петтото издание на турнирот. Избраниците на Борис Ројевиќ со 31-27 славеа над младата репрезентација на Египет, во натпревар во кој стратегот на охриѓани им даде шанса на поголем дел од ракометарите.
По натпреварот, голманот Бојан Блажески истакна дека заморот од претходните натпревари во Струга бил забележлив, но најважно било што екипата стигнала до победата. Воедно, тој посочи дека големата ротација им овозможила на сите ракометари да добијат минутажа.
„Беше тежок натпревар, во кој, мислам дека малку заморот дојде до израз, поради натпреварите што ги имавме во Струга, меѓутоа на крајот успеавме да оствариме победа. Имаше доста ротација во екипата, сите играчи добија минутажа.“
По победничкиот старт, Охрид веќе го очекува далеку посериозен предизвик. Блажески потенцира дека утрешниот дуел со Војводина ќе има двојно значење, бидејќи исходот ќе биде важен и за турнирот „Крсте Андоновски“ и за Регионалната лига. Затоа, охриѓани ќе мораат добро да се одморат, да го анализираат противникот и максимално да се подготват за натпреварот.
„Сега ни следи еден многу тежок натпревар со екипата на Војводина, кој има две значења- резултатот е важен како за турнирот, така и за Регионалната лига..така што сега треба да се одмориме , да анализираме и да се подготвиме за утрешниот меч.“- изјави Блажески за Спортска Мрежа.
Охрид со победата над Египет направи важен чекор кон успешен настап пред домашната публика, но вистинскиот тест следи веќе утре. Против Војводина ќе се бара нова победа, овојпат со дополнителен влог поради бодовите во Регионалната лига.
