По пауза од цели 20 години, ФК Јуниор од Доброшане повторно се враќа во Третата македонска фудбалска лига, откако минатата сезона го освои шампионското место во Општинската фудбалска лига во Куманово и обезбеди пласман во повисок ранг.
Екипата веќе три недели ги одработува подготовките за новата сезона во Трета лига – регион 2, а досега одигра и два контролни натпревари, преку кои стручниот штаб ја темпира формата и го подготвува тимот за предизвиците кои следуваат.
Особено радува фактот што костурот на шампионскиот состав е задржан, што треба да биде една од главните предности на тимот во новата сезона. Паралелно со тоа, клубот веќе ангажираше и неколку нови фудбалери, а работата на засилувањата продолжува со цел да се донесат дополнителен квалитет и поголема конкуренција во составот.
Новата сезона носи промена и на тренерската позиција. Екипата ќе ја предводи Свето Димиќ – Шарац, кој ќе го преземе кормилото и ќе има задача да го води тимот во новиот третолигашки предизвик.
По освоената титула и историскиот камбек во Третата лига, пред клубот е ново поглавје во кое амбицијата е јасна – со максимална борбеност, посветеност и заедништво да се претстави во најдобро светло и достоинствено да ги брани клупските бои.
