Еурофарм Пелистер 2 продолжува да го комплетира составот за новата сезона, со акцент на млади и перспективни ракометари кои треба да донесат дополнителен квалитет во бековската линија.
Нов член на битолскиот суперлигаш е 18-годишниот Марин Крстевски, кој пристигнува од Мулти Есенс. Младиот среден бек зад себе има успешни настапи во младинските категории, каде со својот поранешен клуб освојуваше трофеи, а воедно е и репрезентативец на Македонија до 20 години.
Покрај Крстевски, Еурофарм Пелистер 2 се засили и со Давид Димевски, кој доаѓа од Куманово. Станува збор за ракометар со веќе сериозно суперлигашко искуство, а неговата најдобра сезона ја имаше во 2025 година, кога со 237 постигнати голови беше најдобар стрелец во македонската Суперлига.
Димевски првенствено игра на позицијата лев бек, но може да одговори и на останатите бековски позиции, што му дава дополнителна вредност на ростерот. И тој има репрезентативно искуство во младинските селекции, а беше дел од македонскиот состав на Светското младинско првенство во 2025 година.
Со ангажманот на Крстевски и Димевски, Еурофарм Пелистер 2 добива комбинација од младински потенцијал и суперлигашко искуство, во обид да изгради конкурентен состав за новата сезона.
