Женскиот фудбал во Куманово испишува нова страница. ЖФК Башкими 2024 од оваа сезона 2026/2027 ќе биде дел од Втората женска фудбалска лига, со што клубот за првпат ќе се натпреварува во сениорска конкуренција.
За Куманово, како најголем град во Македонија, ова е историски момент, бидејќи за првпат во историјата градот ќе има свој женски фудбалски клуб во сениорска конкуренција.
Башкими 2024 зад себе има неколку сезони во кои се натпреваруваше во кадетска и младинска конкуренција, а сега клубот прави голем чекор напред со формирањето на сениорски состав.
Од клубот овој момент го опишуваат како историски, особено за женскиот спорт во Куманово, истакнувајќи дека нивниот настап во сениорската конкуренција ќе биде запишан во историјата на градот.
Сепак, во Башкими 2024 се свесни дека првиот чекор во сениорскиот фудбал нема да биде лесен. Токму затоа од клубот упатуваат апел до кумановските бизнисмени, компании и сите оние кои сакаат да го поддржат развојот на женскиот фудбал да се приклучат како донатори или спонзори.
Од клубот посочуваат дека потребните средства за една сезона во женскиот фудбал не се големи, но поддршката во овој момент е особено важна за да може Башкими 2024 успешно да ги направи првите чекори во сениорската конкуренција.
„Бидете дел од историјата“ е пораката од кумановскиот клуб до потенцијалните поддржувачи, со желба првата сениорска сезона да биде почеток на една долгорочна приказна.
- Втората лига со повеќе екипи и четири дебитанти
Влезот на Башкими 2024 доаѓа во сезона во која Втората женска фудбалска лига за првпат ќе има поголем број на екипи, што е позитивен сигнал за развојот и проширувањето на женскиот фудбал.
Покрај кумановскиот Башкими 2024, дебитанти во второлигашката конкуренција ќе бидат и Менада од Тетово, Ржаничино од Скопје и Топ Гирлс од Охрид.
Во лигата се враќа и Победа од Валандово, додека од минатата сезона во ова натпреварување остануваат Плачковица од Радовиш, поранешниот шампион Билјанини Извори од Охрид, Борец од Велес, Слободен од Скопје и Топ Гол од Битола, кој минатата сезона испадна од Првата женска фудбалска лига.
Со новите средини и поголемиот број клубови, Втората лига добива дополнителна конкуренција, но и нова можност за развој на женскиот фудбал во повеќе градови.
А за Куманово, септември ќе биде посебен – Башкими 2024 за првпат ќе излезе на сениорската сцена и ќе го претставува градот во женскиот фудбал.
