Третолигашот Овче Поле од Свети Николе ги започна подготовките за сезоната 2026/27, со јасно поставена цел – освојување на првото место во Трета лига – регион 3 и обезбедување бараж за пласман во Втората македонска фудбалска лига.
Првата прозивка беше одржана вчера со почеток од 18:00 часот, а стручниот штаб предводен од Јорданчо Трендафилов, заедно со неговите соработници Тони Серафимов и Андреја Ефремов, на располагање го имаше поголемиот дел од играчкиот кадар. Од клубот најавуваат дека останатите фудбалери ќе се приклучат во наредните денови.
Костурот на тимот останува речиси непроменет во однос на минатата сезона, а раководството работеше и на дополнително засилување на составот. Нови членови на Овче Поле се Никола Стоиловски, кој пристигнува од ГФК Осогово, Метин Керими од Беласица, како и младите Андреј Славевски од Њу Старс, Стефан Антониев, Горјан Кочиев и Филип Митев, кои доаѓаат од младинските категории на Брегалница Штип. Во клубот откриваат дека трансфер-пазарот сè уште не е завршен и дека во следниот период се очекува пристигнување на уште два до три квалитетни фудбалери, по што ростерот за есенскиот дел од сезоната ќе биде комплетиран.
Минатата сезона Овче Поле беше еден од најсериозните кандидати за шампионската титула во Трета лига – Исток, но во неизвесната трка не успеа да ја надмине Победа Валандово, која го освои првото место што водеше во баражот за Втората лига.
Сега клубот од Свети Николе повторно влегува со највисоки амбиции и ќе атакува на лидерската позиција во Трета лига – регион 3, која носи можност за бараж и пласман во второлигашкото друштво.
Во наредниот период Овче Поле ќе одигра и неколку контролни натпревари, преку кои стручниот штаб ќе ја темпира формата, со цел екипата максимално подготвена да го дочека почетокот на новата сезона.
