Женскиот фудбалски клуб Пелистер интензивно се подготвува за новата натпреварувачка сезона во Првата женска фудбалска лига, во која ќе настапува со ново име и засилен играчки кадар.
Битолскиот тим минатата сезона, настапувајќи под името ЖФК Конзули, без поголеми проблеми ја освои титулата во Втората женска фудбалска лига и обезбеди промоција во домашната елита. Од сезоната 2026/2027, која стартува на 23 август, клубот официјално ќе се натпреварува под името ЖФК Пелистер.
Во пресрет на новите предизвици, Пелистер ги засили своите редови со три млади и перспективни фудбалерки. Нов член на тимот е 18-годишната Михаела Марковска, која пристигнува од Вардар, а своите први фудбалски чекори ги направи во битолски Топ Гол.
Дресот на Пелистер ќе го носи и 17-годишната Александра Ристевска, која го реализира својот прв трансфер во кариерата, преминувајќи од Топ Гол во битолскиот прволигаш.
Ново име меѓу стативите е и 14-годишната голманка Магдалена Иломановска. Таа доаѓа од Топ Гол, а фудбалската кариера ја започнала во редовите на Атлетико.
Стручниот штаб и во новата сезона ќе го предводи Наум Љамчевски, додека негов прв помошник ќе биде Јован Алексовски.
Подготовките се во полн ек, а денес Пелистер ќе го одигра првиот контролен натпревар против Ас Јунајтед во Струга. До почетокот на првенството, битолчанки ќе ги одмерат силите и со Истатов, како и со актуелниот шампион Скопје.
Новата сезона во Првата женска фудбалска лига, ЖФК Пелистер ќе ја започне со тешко гостување во Струмица, каде во првото коло ќе се соочи со Тиверија Брера. Со новото име, засилувањата и желбата за докажување во елитното друштво, битолчанки ќе се обидат да остават силен впечаток уште во својата повратничка сезона меѓу најдобрите.
