Македонскиот прволигаш Тиквеш успешно ги затвори сите отворени случаи пред ФИФА и повеќе не се наоѓа на листата на клубови со забрана за регистрација на нови фудбалери.
Кавадаречкиот клуб претходно имаше две активни санкции од Светската фудбалска федерација, секоја со важност од по три преодни рока, поради неисплатени обврски кон поранешни странски фудбалери. Откако сите побарувања се подмирени, Тиквеш официјално е избришан од таканаречената „црна листа“ на ФИФА.
Во моментов, од македонските клубови на оваа листа остануваат само Воска Спорт и Шкупи. Воска Спорт, некогашен прволигаш, повеќе не се натпреварува во ниту еден ранг на македонскиот фудбал, додека Шкупи, кој минатата сезона испадна од Првата македонска фудбалска лига, од 15 август ќе настапува во Втората лига и сè уште се соочува со активни санкции од ФИФА.
За Тиквеш ова претставува значаен чекор кон целосна финансиска и организациска стабилизација. Клубот во изминатите сезони испиша една од најубавите страници во својата историја, освојувајќи го Купот на Македонија и обезбедувајќи го првиот европски настап.
Воедно, кавадарчани на одличен начин ја отворија и новата сезона во Првата македонска фудбалска лига. Пред својата публика, Тиквеш убедливо го совлада Арсими со 5:1, испраќајќи јасна порака дека и оваа сезона има високи амбиции во домашниот шампионат.
