Третолигашот Борец од Велес влегува во нова организациска етапа, откако досегашниот претседател и сопственик Марјан Нацев се повлече од функцијата поради здравствени причини.
Во наредниот период клубот ќе биде раководен од Управен одбор, кој допрва треба да биде конституиран. Очекувањата се новото раководство да постави цврсти темели за стабилно функционирање на клубот и успешно да го подготви тимот за настап во новата сезона во Третата македонска фудбалска лига – Регион 4.
Борец зад себе има успешна сезона во која ја освои шампионската титула во Третата лига – Југ и избори бараж за пласман во Втората лига. Сепак, велешани не успеаја да направат чекор напред, откако во баражот одигран во Кочани претрпеа убедлив пораз од Кожуф, со што останаа без промоција.
Некогашниот прволигаш и еден од клубовите со богата традиција во македонскиот фудбал, по испаѓањето од елитното друштво сè уште го бара патот за враќање во Првата македонска фудбалска лига. Новото раководство ќе има задача да создаде стабилна основа и амбициозен проект со кој Борец повторно би се вклучил во битката за повисок ранг.
Од клубот му посакаа брзо закрепнување на Марјан Нацев, заблагодарувајќи му за досегашниот ангажман, а на новото раководство му посакаа многу успех во предизвиците што претстојат.
