Прволигашот Брегалница продолжува активно да го комплетира тимот за новата сезона во Првата македонска фудбалска лига, а ново засилување во редовите на штипските „сини“ е искусниот голман Амир Јашар.
35-годишниот чувар на мрежата пристигнува од Башкими, каде што настапуваше повеќе од година и пол. Во минатата прволигашка сезона бранеше на 24 натпревари и на шест од нив успеа да ја сочува својата мрежа недопрена, потврдувајќи ги своите квалитети и искуство.
Јашар зад себе има богата кариера. Во Македонија ги бранеше боите на Кожуф, Скопје, Гостивар, Шкупи, Тетекс и Дрита Боговиње, додека интернационално искуство стекна во Косово, настапувајќи за Вуштрија и Влазнија.
Со ангажманот на искусниот голман, Брегалница добива дополнителна сигурност меѓу стативите во пресрет на прволигашките предизвици. Раководството на клубот продолжува со формирањето на ростерот, а во наредниот период се очекуваат и нови промоции на засилувања.
Новата сезона во Првата македонска фудбалска лига за Брегалница започнува на 25 јули, кога штипскиот состав ќе му гостува на актуелниот шампион Вардар во првото коло од шампионатот.
