По долг период на неизвесност, во Општинскиот фудбалски сојуз Кичево и официјално започнува ново поглавје. На вонредното собрание, одржано вчера, делегатите едногласно го избраа новото раководство на досегашниот суспендиран ОФС Кичево, со што беа поставени темелите за нов почеток и стабилизација на сојузот.
Со едногласна поддршка, за нов претседател на ОФС Кичево беше избран Марјан Стојановски, кој ја доби довербата да го предводи сојузот во наредниот период и да работи на развојот и унапредувањето на фудбалот во општината. За потпретседател е назначен Лика Куштрим.
На Собранието беше избран и новиот Управен одбор, кој ќе функционира во состав: Александар Грујоски, Марјан Стојановски, Лика Куштрим, Давор Цветаноски, Игор Николаевски, Фрањо Павичиќ и Роберт Тодоров.
Со изборот на новото раководство се очекува ОФС Кичево да започне со редовно функционирање и реализација на активности насочени кон подобрување на организацијата на натпреварувањата, поддршка на клубовите и развој на фудбалот во кичевскиот регион.
