Иако не успеа да ја продолжи својата авантура во квалификациите за Лигата на шампионите, Вардар останува на европската сцена. По драматичната елиминација од фински КуПС, „црвено-црните“ европскиот пат го продолжуваат во второто квалификациско коло од УЕФА Конференциската лига, каде за противник ќе го имаат шампионот на Летонија – Рига.
Летонскиот претставник исто така пристигнува во ова натпреварување по елиминацијата од квалификациите за Лигата на шампионите. Рига во двомечот беше поразена од ерменскиот Арарат со вкупни 4-3. По поразот од 2-0 на првиот натпревар, Летонците на реваншот славеа со 3-2, но тоа не беше доволно за пласман понатаму.
Првиот натпревар меѓу Вардар и Рига ќе се одигра во Скопје на 22 јули со почеток од 20:00 часот на Националната арена „Тодор Проески“, додека реваншот е закажан за 28 јули во главниот град на Летонија, а точниот термин дополнително ќе биде потврден од домаќинот.
За Вардар ова ќе биде прва официјална пресметка со клуб од Летонија на европската сцена. Македонскиот шампион ќе се обиде да ја искористи добрата игра од реваншот против КуПС и да направи нов исчекор во Европа.
Рига е релативно млад клуб, основан во 2014 година по спојувањето на Карамба и Динамо Рига, но за кратко време се изгради во една од најсилните екипи во летонскиот фудбал. Клубот досега освои четири шампионски титули, меѓу кои и последната во сезоната 2025, а домашните натпревари ги игра на стадионот „Сконто“ во Рига.
Двомечот со летонскиот шампион ќе биде нов голем европски тест за избраниците на Кристијан Фабијани, кои ќе се обидат да обезбедат место во третото квалификациско коло од УЕФА Конференциската лига.
