Борче Христов е нов тренер на Пелистер, потпиша двегодишен договор со битолскиот клуб

Од Пелистер истакнуваат дека Христов е тренер со богато искуство во македонскиот фудбал, но и со значајна меѓународна кариера. Во својата досегашна работа беше дел од повеќе успешни проекти, а последен ангажман имаше на клупата на Тиквеш.

Во домашниот шампионат претходно ги предводеше и екипите на Борец, Работнички, Еуромилк Горно Лисиче, Македонија Ѓорче Петров и Шкендија, додека на меѓународната сцена работеше во азербејџанските клубови Карабах и Зира.

Во клубот веруваат дека неговото знаење, визија и карактер ќе бидат од големо значење во исполнувањето на клупските амбиции, кои се јасно поставени – експресно враќање на Пелистер во Првата македонска фудбалска лига.

Стартот на подготовките за новата сезона е закажан за 9 јули, кога ќе биде извршена првата прозивка на фудбалерите, со што официјално ќе започнат подготовките за предизвиците што го очекуваат битолскиот клуб.

Од ФК Пелистер му посакаа на Борче Христов многу здравје, успех и бројни заеднички победи на клупата на „зелено-белите“.