Во село Дебреште ова лето по трет пат ќе се одржи Меморијалниот турнир во мал фудбал „Алмир Ибески – Алмо 2026“, кој и оваа година носи силни емоции, голем спортски ривалитет и богат награден фонд. Турнирот е посветен на споменот на Алмир Ибески – Алмо, пријател, брат и соиграч, чиј дух и понатаму ги обединува љубителите на фудбалот.
Големата спортска манифестација започнува на 20 јули 2026 година, а пријавувањето трае до 17 јули, додека ждрепката е закажана за 18 јули во 20:00 часот. Котизацијата изнесува 8.000 денари по екипа, а ќе учествуваат вкупно 32 екипи кои ќе се борат за награден фонд од 500.000 денари.
Особено внимание привлекува наградата за првото место која изнесува 250.000 денари, додека второпласираниот тим ќе добие 150.000 денари, а третото место 80.000 денари. Ќе бидат доделени и индивидуални признанија за најдобар играч (6.000 денари) и најдобар голман (4.000 денари).
Организаторите најавуваат професионално судење и бод-систем кој ќе гарантира фер и квалитетни натпревари, а пријавувањето ќе биде валидно по уплата на сметка или преку одговорните лица од организацијата.
Посебно значајно е што и оваа година Спортска Мрежа е официјален медиумски покровител на турнирот, со што ќе обезбеди целосна медиумска покриеност, извештаи и промоција на сите натпревари и најважни моменти.
Турнирот „Алмир Ибески – Алмо“ и ова лето ветува врвен фудбал, силни емоции и незаборавна атмосфера, со порака дека споменот живее преку спортот: заедно во спомен, заедно за победа!
