Новиот прволигаш Шкендија Арачиново продолжува со интензивното засилување на играчкиот кадар во пресрет на историската сезона во Првата македонска фудбалска лига. Најново име во редовите на клубот е бразилскиот фудбалер Верли Валтер Насименто Фереира, кој ќе ја засили конкуренцијата во одбранбената линија.
Станува збор за 26-годишен лев бек, кој во Арачиново пристигнува со цел да донесе дополнителен квалитет, искуство и сигурност во дефанзивата, но и препознатливиот бразилски менталитет и страст кон фудбалот.
„Со задоволство ви го претставуваме најновото засилување на нашиот тим, Бразилецот Верли Валтер Насименто Фереира. Дваесет и шестгодишниот лев бек доаѓа за да ја зголеми конкуренцијата, квалитетот и искуството во одбранбениот ред, носејќи го со себе бразилскиот менталитет и страст за фудбалот. Добредојде во црвено-црното семејство, Верли! Ти посакуваме многу успеси и победи во дресот на Шкендија“, велат од Шкендија Арачиново.
Фереира пристигнува од бразилскиот фудбал, каде настапуваше за Мадуреира, а во досегашната кариера има играно и во пониските бразилски лиги, како и во Белизе, каде го носеше дресот на Белмопан.
Шкендија Арачиново ова лето активно работи на формирање конкурентен состав за својата дебитантска сезона во елитното македонско фудбалско друштво, со јасна цел да остави силен впечаток во прволигашката конкуренција.
