Освојувачот на Купот на Македонија, Силекс, продолжува активно да го засилува играчкиот кадар во пресрет на новата сезона, во која кратовчани повторно ќе ги бранат клупските бои и на европската сцена.
Нови членови на составот предводен од Александар Васоски се босанските офанзивци Нихад Шеро и Есмир Хасукиќ, кои ќе претставуваат дополнителна сила во нападот на кратовскиот прволигаш.
27-годишниот Шеро настапува на крилните офанзивни позиции и во Силекс пристигнува од редовите на Челик, зад себе имајќи настапи за повеќе клубови во Босна и Херцеговина. Од друга страна, 24-годишниот Хасукиќ е класичен централен напаѓач, висок 183 сантиметри, кој во Кратово доаѓа од екипата на ГОШК Габела.
Двајцата фудбалери веќе им се приклучија на новите соиграчи во Охрид, каде Силекс ги одработува подготовките за настапот во квалификациите за Конференциската лига на УЕФА.
Кратовчани, кои минатата сезона го освоија Купот на Македонија и на тој начин обезбедија излез на европската сцена, веќе го одиграа и првиот контролен натпревар за време на подготовките. На тест-мечот против албанскиот Динамо Тирана, Силекс беше поразен со 1:2.
Во првото квалификациско коло од Конференциската лига на УЕФА, Силекс ќе се соочи со белорускиот претставник Динамо Минск, а првиот дуел е закажан за 9 јули. Во Кратово веруваат дека новите засилувања ќе донесат дополнителен квалитет и ќе помогнат тимот успешно да одговори на предизвиците што претстојат на домашната и европската сцена.
