Второлигашот Новаци и искусниот стратег Дарко Крстески ставија крај на меѓусебната соработка по три години заедничка работа, период во кој прилепскиот тренер остави значаен белег во клубот.
Крстески беше еден од најзаслужните за стабилизацијата и резултатскиот подем на Новаци во изминатиот период. Минатата сезона тимот ја заврши на седмата позиција во Втората македонска фудбалска лига, што претставува еден од најдобрите резултати на клубот во последната деценија.
Особено значајно е што 54-годишниот стратег остана со клубот и во најтешките моменти. Пред почетокот на минатата сезона постоеја бројни дилеми околу иднината на Новаци и начинот на функционирање на клубот, пред сè од финансиски аспект. По влезот на компаниите Евротип и Голд Филиција следуваше период на консолидација, а токму под водство на Крстески тимот успеа да оствари одличен резултат и да биде едно од најпријатните изненадувања во второлигашката конкуренција.
Во својата тренерска кариера Крстески ги предводеше Победа, со која обезбеди и пласман во Првата македонска фудбалска лига, како и Пелистер, Караорман и Новаци. Искусниот тренер поседува УЕФА Про лиценца и во моментов е без ангажман, што значи дека наскоро би можел да добие нов предизвик во кариерата.
Од таборот на Новаци преку соопштение ја потврдија разделбата со досегашниот тренер Дарко Крстески, посакувајќи му среќа во иднина.
„Благодариме за сè, Дарко Крстески! ФК Новаци ти посакува многу успех и среќа во иднина. Твојот придонес за клубот нема да биде заборавен“, велат од клубот.
