Европската ракометна федерација официјално потврди дека Вардар, следната сезона ќе биде дел од најелитното клупско натпреварување, Лигата на шампионите.
Македонскиот првак доби специјална покана и повторно ќе се натпреварува со најдобрите европски тимови, враќајќи се на сцената на која во минатото ги испиша најголемите успеси.
Покрај Вардар, место преку вајлд-карта обезбедија уште Архус, ГОГ Гудме, Нант, Монпелје, Фуксе Берлин, ПИК Сегед, Висла Плоцк, Порто, Партизан, Криенс Луцерн, Целје и Кристијанштад.
Дел од Лигата на шампионите ќе бидат и екипите кои директно обезбедија место во групната фаза – Загреб, Алборг, Барселона, ПСЖ, Магдебург, Веспрем, Колстад, Келце, Мелсунген, Спортинг Лисабон и Динамо Букурешт.
Ждрепката за групната фаза е закажана за 26 јуни со почеток во 11 часот, а новата сезона ќе донесе и изменет формат на натпреварување. Наместо досегашниот систем, Лигата на шампионите ќе се игра со шест групи составени од по четири екипи.
За Вардар ова претставува нова можност да се докаже на највисоко ниво и повторно да биде дел од европската ракометна елита.
