Новата сезона во македонската Супер Лига носи возбудлив есенски распоред, а по извлекувањето на натпреварувачките броеви стана јасно кога ќе се играат најголемите дерби натпревари.
Сезоната ќе започне на 5 или 6 септември со дуелот меѓу Охрид и Еурофарм Пелистер, а токму охриѓани ќе имаат најинтензивен старт. Во првите шест кола тимот ќе ги одигра сите дерби натпревари – најпрво го пречекува Еурофарм Пелистер, потоа гостува кај Вардар во Скопје, а веднаш потоа ќе биде домаќин на Алкалоид.
Вардар ќе биде домаќин на сите големи дерби средби во есенскиот дел. „Црвено-црните“ прво ќе го пречекаат Охрид, потоа Еурофарм Пелистер, а во средината на ноември и Алкалоид. Според најавите, скопскиот клуб натпреварите ќе ги игра во новата сала „Расадник“, додека мечевите со најголем интерес би можеле да се одиграат во СЦ „Јане Сандански“.
Првото големо македонско дерби меѓу Вардар и Еурофарм Пелистер е закажано за деветтото коло, односно на 31 октомври или 1 ноември во Скопје. Од друга страна, битолчани есенва речиси сите најтешки натпревари ќе ги играат на гостински терен, додека клучните домашни пресметки ќе ги имаат на пролет, непосредно пред стартот на плеј-офот.
