По повеќе од 20 години, Градскиот стадион „Никола Мантов“ во Кочани конечно ќе добие реконструкција. Проектот, кој долго време беше желба на спортската јавност во градот, влегува во завршна фаза на подготовка, а наскоро се очекува и почеток на градежните активности.
Во пресрет на реализацијата на проектот, на стадионот беше извршен увид во моменталната состојба на поттрибинскиот простор. На увидот присуствуваа претседателот на Општинскиот фудбалски сојуз Кочани, Александар Андов, секретарот на Општина Кочани, како и претставникот на Фудбалската федерација на Македонија, Илија Илиев – Рома.
Од ОФС Кочани посочуваат дека реконструкцијата ќе значи многу подобри услови за работа на спортските клубови, спортистите и сите љубители на фудбалот во градот.
Во врска со посетата и најавените активности, претседателот на ОФС Кочани, Александар Андов, изјави:
„Денес бев присутен на Градскиот стадион „Никола Мантов“ во Кочани заедно секретарот на општина Кочани и претставник од Фудбалската Федерација на Македонија каде се изврши увид во моменталната состојба на поттрибинскиот простор од страна на претставник определен од Фудбалската федерација на Македонија.
Набргу се очекува да започнат и градежните активности за реконструкција на стадионот – проект кој е од огромно значење за нашиот град и за спортот во Кочани.
Горд сум што по повеќе од 20 години ќе започне реконструкцијата на нашиот стадион, со што ќе се создадат подобри услови за спортистите, клубовите и сите љубители на фудбалот. Посебна благодарност до претседателот на Фудбалската федерација на Македонија, г-дин Масар Омерагиќ, за големата поддршка и посветеноста во унапредувањето на спортската инфраструктура низ цела Македонија“, вели претседателот на ОФС Кочани, Александар Андов.
Реконструкцијата на стадионот „Никола Мантов“ се очекува да донесе значително подобрување на инфраструктурните услови во Кочани и да претставува нов поттик за развојот на фудбалот и спортот во регионот.
