Новиот второлигаш Камјани сериозно се подготвува за својата дебитантска сезона во Втората македонска фудбалска лига, а раководството веќе започна со засилување на играчкиот кадар. Прво позвучно име кое пристигнува во редовите на клубот е искусниот стопер Арсим Љамалари.
31-годишниот дефанзивец доаѓа од Шкендија Арачиново и ќе претставува значајно засилување за тимот кој за првпат во својата историја ќе настапува во второлигашката конкуренција. Љамалари зад себе има богато искуство на македонската фудбалска сцена, настапувајќи за клубови како Силекс, Беса Добридол, Еуромилк и Шкендија Арачиново.
Камјани до историскиот пласман во Втората лига стигна по одличната сезона во Третата лига – Запад, каде ја освои шампионската титула. Потоа, во баражот за пласман во ВМФЛ, тимот беше поуспешен од Победа Валандово, шампионот на Третата лига – Исток, и на тој начин обезбеди место меѓу второлигашите.
Ангажманот на Љамалари е само почеток на амбициозниот проект на клубот. Според информации на Спортска Мрежа, во следните денови Камјани ќе промовира уште неколку искусни и докажани фудбалери, со што јасно покажува дека нема намера да биде само учесник во Втората лига, туку и сериозен конкурент.
Од Тетово испраќаат порака дека се работи на создавање конкурентен состав кој ќе може достоинствено да се претстави во новото друштво, а првите потези на трансфер-пазарот покажуваат дека клубот има високи амбиции пред стартот на новата сезона.
