Младата македонска таеквондистка Душица Бреслиева од ТК Штип освои бронзен медал на Европското клупско првенство што се одржа во Босна и Херцеговина.
Бреслиева настапи во категоријата до 55 килограми и прикажа одлични борби на патот до освоениот медал. Во првото коло таа ја совлада Џејланаз Дурназ од Турција со 2:1, покажувајќи голема борбеност и квалитет.
Во четвртфиналето македонската претставничка беше уште поубедлива и со 2:0 ја победи Гркинката Елефтерија Вамвакаки, со што обезбеди место меѓу четирите најдобри натпреварувачки на шампионатот.
Во полуфиналната пресметка Бреслиева се соочи со Хрватката Клара Углешиќ. И покрај големата борба, македонската таеквондистка беше поразена со 2:0 и го заврши настапот со заслужен бронзен медал.
Овој успех претставува уште една потврда за талентот и потенцијалот на младата таеквондистка, како и за квалитетната работа во ТК Штип, кој продолжува успешно да ја претставува Македонија на меѓународната сцена.
