Македонскиот футсал шампион КМФ Проект продолжува да го задржува шампионското јадро и за новата сезона. Тимот од Јосифово официјално ја продолжи соработката со двајца важни членови на составот од минатата сезона – Наум Блажевски и голманот Мирко Соколов.
Во клубот не го кријат задоволството што и двајцата ќе останат дел од проектот кој во изминатата сезона испиша историја. КМФ Проект по вторпат стана шампион на Македонија, а за првпат во своето постоење го освои Купот на Македонија, комплетирајќи ја двојната круна.
Блажевски важи за еден од најсигурните играчи во дефанзивната линија на тимот. Од клубот истакнуваат дека неговата пожртвуваност, дисциплина и тактичка зрелост го прават еден од столбовите на составот.
„Наум Блажевски и наредната сезона дел од КМФ Проект! Кога зборуваме за цврстина, стабилност и сигурност, името на Наум Блажевски секогаш е синоним за се тоа. Еден од столбовите на нашиот бедем, играч кој со својата пожртвуваност, дисциплина и тактичка зрелост носи сигурност во тимот во секој натпревар. Наум не е човек на големи зборови. Неговите дела зборуваат наместо него. Тивок, скромен и секогаш подготвен да го стави тимот пред себе, тој е вистински пример за професионализам и посветеност. Во време кога спортот и футсалот бараат карактер, Наум е токму тоа – играч на кој секогаш можеш да се потпреш“, велат од клубот.
Продолжување на соработката доби и искусниот голман Мирко Соколов, кој и во наредната сезона ќе биде важен дел од шампионскиот состав.
„КМФ Проект со гордост објавува дека и следната сезона продолжува со човекот кој носи мир, баланс и сигурност во тимот. Мирко Соколов е и “човек од соблекувална” — личност кој со своето искуство знае да смири, да поддржи и да биде важна врска помеѓу сите во екипата. Еден од најдобрите голмани кој не секогаш е во прв план, но неговото присуство се чувствува и на терен и надвор од него. Како голман, носи сигурност. Како човек, носи позитивна енергија. Како дел од Проект, носи вредност што секој тим ја посакува“, велат од клубот.
Со задржувањето на Блажевски и Соколов, КМФ Проект испраќа јасна порака дека сака да го задржи победничкиот костур на екипата. Тимот веќе се подготвува за новите предизвици, меѓу кои најголем ќе биде настапот во квалификациите за Лигата на шампионите, каде шампионот на Македонија ќе се обиде достојно да ја претставува државата на европската сцена.
