Актуелниот шампион и освојувач на Купот на Македонија, КМФ Проект, продолжува со формирањето на тимот за новата сезона и настапот во квалификациите за Лигата на шампионите. Димитар Јанев останува во шампионскиот состав и следната сезона, кој важи за еден од играчите кои во изминатите години израсна во важен дел од Проект.
Јанев веќе пет сезони го носи зелено-црниот дрес и е еден од играчите кои заедно со клубот го минуваа патот до врвот на македонскиот футсал. Од млад и перспективен играч, тој прерасна во еден од носителите на играта на КМФ Проект.
Од клубот со задоволство ја потврдија продолжената соработка со футсалерот.
„Од млад талент до носител на играта! Шизик останува верен на КМФ Проект! Кога Димитар Јанев пристигна во КМФ Проект беше момче со голем потенцијал и желба за докажување. Денес, по пет сезони во зелено-црниот дрес, тој е изграден, зрел и искусен играч кој има значајна улога и е еден од носителите во нашиот тим. Заедно поминавме низ многу предизвици, натпревари и успеси, а Димитар растеше паралелно со клубот, покажувајќи посветеност, карактер и континуиран напредок од сезона во сезона. Иако зад себе веќе има сериозно искуство, веруваме дека неговите најдобри партии допрва доаѓаат. Со талентот, работната етика и амбицијата што ги поседува, најдоброто од Шизик сè уште е пред нас. Со големо задоволство објавуваме дека и во сезоната 2026/27 ќе продолжиме да ја градиме оваа приказна заедно. Пет сезони заедно. Најдоброто допрва следува“, велат од КМФ Проект.
Минатата сезона беше историска за тимот од Јосифово. Проект ја освои шампионската титула во Првата футсал лига без ниту еден пораз и без ниту едно реми, а по вторпат се искачи на футсал тронот во Македонија. Покрај тоа, клубот за првпат во својата историја го освои и Купот на Македонија, комплетирајќи двојна круна.
Во пресрет на новите предизвици и квалификациите за Лигата на шампионите, раководството на клубот веќе ја потврди соработката со неколку клучни играчи. Претходно договорите беа продолжени со искусниот Мартин Тодоровски, најдобриот стрелец Марио Благојевски и голманот Антонио Петровски.
Со задржувањето на костурот на шампионскиот тим, КМФ Проект јасно покажува дека и во новата сезона ќе има највисоки амбиции – одбрана на двојната круна и достојно претставување на Македонија на европската сцена.
