Нашиот најдобар автомобилист, Игор Стефановски – Иџе, имаше неверојатен тркачки викенд на патеката Еце Хомо во Чешка, кој донесе вистинска драма, пех и на крајот голем успех.
Викендот започна несреќно за македонскиот ас, откако во првата трка доживеа сериозно излетување од патеката, при што неговиот автомобил претрпе значителни оштетувања. И покрај тоа, Иџе и неговиот тим направија огромен напор и во рекордно време успеаја да го оспособат болидот за втората трка.
Во вториот настап, Стефановски покажа карактер, борбеност и врвна возачка умешност, па успеа да се искачи на подиумот и да го освои третото место, со што го заокружи викендот со значаен резултат.
„Ова беше една од најтешките трки во мојата досегашна кариера. Имавме навистина големи оштетувања на автомобилот, но со брза реакција на мојот тим успеавме да го оспособиме за втората трка. На крајот некако стигнавме до третото место и овој пехар ќе има посебно место на мојата полица, бидејќи навистина го заслужува тоа. Сакам да им се заблагодарам на сите за огромната поддршка“, изјави Иџе.
Следната трка за Иџе е веќе претстојниот викенд, кога ќе настапи во рамки на Европскиот шампионат во ридско-планински трки во Германија, на патеката во Глазбахренен. Македонскиот автомобилист ќе се обиде да ја продолжи добрата форма и да освои нови бодови во генералниот пласман, по успешниот настап во Чешка.
