Македонската таеквондо натпреварувачка Милијана Релиќ освои бронзен медал на Г-3 турнирот што се одржа во Германија, по серија одлични настапи и важни победи против квалитетни противнички.
Релиќ го започна настапот сигурно, совладувајќи ја Натали Тадиќ од Хрватска со 2:0 во рунди во првото коло. Со стабилна и контролирана борба, таа го продолжи својот пат и во второто коло, каде беше подобра од Ингибројд Греташтодир од Исланд.
Најголемиот успех на турнирот го обезбеди во борбата за медал, каде во неизвесен дуел со Чаима Тоуми од Тунис славеше со 2:1 во рунди и со тоа го осигура бронзениот медал.
Во полуфиналната фаза, Релиќ имаше исклучително тежок предизвик против една од најдобрите натпреварувачки во категоријата – олимписката шампионка од Париз, Вивијана Мартон од Унгарија. И покрај борбениот настап, македонската натпреварувачка беше поразена со 2:0 во рунди, но со пласманот во полуфинале и освоениот бронзен медал уште еднаш го потврди својот квалитет на меѓународната сцена.
