Изминатата недела на терените на МТП клубот се одржаа натпреварите од МТП Опен 2026 во двете конкуренции за тенисери и тенисерки до 14 години. Турнирот беше од категорија 3.
Кај момчињата триумфираше Томас Ван Фрут од Холандија, кој во финалето го совлада Сами Дамни со 2-0 во сетови. Кај девојчињата победничка беше Софија Синкевич од Украина, која со 2-0 во сетови беше подобра од Марија Гарферт.
Во конкуренцијата на двојки, титулата им припадна на финалистите од машкото финале – Ван Фрут и Дамни, кои уште еднаш потврдија одлична форма. Кај девојчињата, трофејот го освоија Синкевич и Ана Куликовска од Украина.
Од македонските тенисери најдобар резултат постигна Андреј Темов, со пласман во две полуфиналиња – во поединечна конкуренција и во двојки. Кај девојчињата, Деа Крстевска стигна до четвртфиналето во сингл, додека заедно со Ведрана Таневска во двојки исто така беа четвртфиналистки.
Тениските турнири за млади категории во Македонија продолжуваат и оваа недела, со натпреварите од Поинтер Опен 2026 за тенисери и тенисерки до 16 години.
