Историската европска титула донесе незаборавни моменти за сите во таборот на Охрид, а посебни емоции имаше кај капитенот Гоце Ојлески. Како еден од лидерите на тимот, тој не го криеше задоволството по освоениот Европски Куп и успехот кој засекогаш ќе остане запишан во историјата на клубот и градот.
Во изјава за Спортска Мрежа, капитенот Ојлески, истакна дека триумфот е целосно заслужен, нагласувајќи дека Охрид одиграл на високо ниво во двата финални натпревари. Според него, борбеноста и пожртвуваноста на целиот тим биле клучни за освојувањето на трофејот.
„Ова е еден голем ден за нашиот град и за клубот. Направивме историја за Охрид, сметам дека заслужено победивме – во двата натпревари одигравме одлично. Вечерва бевме навистина борбени, момците изгинаа на терен, од прв до последен. Рано останавме без Иванковиќ поради црвениот картон, но тоа не нè демотивираше за да не стигнеме до пехарот – напротив сите се боревме и на крај заслужено победивме.“- изјави Ојлески за Спортска Мрежа.
Капитенот и неговите соиграчи успеаја да го остварат сонот на многу генерации охридски ракометари и навивачи. Со европскиот трофеј во рацете, Охрид испиша нова страница во својата спортска историја и го круниса најуспешниот период во постоењето на клубот.
