Фудбалскиот клуб Кожуф продолжува да ја потврдува квалитетната работа со младите категории, откако генерацијата 2018 освои пехар на завршниот турнир во Детската лига на Фудбалската федерација на Македонија и сезоната ја заврши меѓу четирите најдобри екипи во државата.
Младите фудбалери од Гевгелија, предводени од тренерот Бојана Танова, имаа одличен настап на завршницата и покажаа голем потенцијал, талент и фудбалска зрелост и покрај нивната возраст.
Патот до пехарот го започнаа со убедлива победа во осминафиналето против Дарданет од Тетово со 8:2. Во четвртфиналето следуваше уште еден одличен настап и триумф над Пелистер од Битола со 5:3, со што Кожуф обезбеди место меѓу четирите најдобри екипи во Македонија.
Во полуфиналниот дуел младите надежи на Кожуф одиграа неизвесен и возбудлив натпревар против Вардар, но на крајот скопскиот состав славеше со 4:3 и се пласираше во финалето.
Освоениот пехар претставува уште едно големо признание за работата во младинската школа на Кожуф. Генерацијата 2018 важи за една од најталентираните во клубот и претставува одлична основа за иднината на гевгелискиот фудбал.
Посебни заслуги за овој успех има тренерот Бојана Танова, која континуирано работи со младите фудбалери и преку стручна и посветена работа успева да создаде генерации кои бележат значајни резултати на национално ниво. Токму ваквите успеси се најдобар доказ дека во Кожуф се работи правилно и системски со најмладите категории.
Со овој резултат, Кожуф уште еднаш потврди дека располага со голем број талентирани деца и дека иднината на клубот е во сигурни раце.
