Фудбалската школа Јанг Тим од Струга уште еднаш потврди дека е една од најквалитетните и најорганизираните школи во Македонија, откако генерацијата 2014 стана шампион во ФФМ Детската лига.
Младите стружани до шампионскиот трофеј стигнаа по одлични настапи во нокаут фазата, покажувајќи карактер, квалитет и победнички менталитет во секој натпревар.
На патот до титулата, Јанг Тим во осминафиналето го совлада Атлетико со убедливи 5:1, а во четвртфиналето по голема бо
рба одигра 2:2 против Карев, по што славеше со 3:0 на пенали.
Во полуфиналето избраниците на тренерскиот тандем Милот Лена и Сеит Крека го елиминираа Бутел со победа од 2:1, додека во големото финале одиграа 0:0 против Парк и повторно беа поуспешни во пенал-рулетот, триумфирајќи со 3:1 за големо славје и шампионски пехар.
Дополнително признание за успешната сезона доби и голманот на Јанг Тим, Леонид Илиоски, кој беше прогласен за најдобар голман на завршниот турнир.
Овој успех е уште една потврда за квалитетната работа која со години се реализира во струшкиот клуб. Јанг Тим важи за една од најдобрите фудбалски школи во Македонија, од која произлегле голем број талентирани фудбалери, а школата континуирано работи на развојот на младите категории.
Тренерите Милот Лена и Сеит Крека уште еднаш на дело покажаа дека се работи за стручњаци кои знаат како да работат со младите фудбалери, создавајќи генерации кои успешно се натпреваруваат и освојуваат трофеи.
Јанг Тим е препознатлив и по своите настапи на бројни меѓународни турнири низ Европа, каде редовно ги претставува Струга и Македонија на најдобар можен начин. Амбициите на клубот продолжуваат и во наредниот период, а една од следните станици ќе биде и првото издание на меѓународниот турнир „Охрид Куп 2026“, каде младите стружани повторно ќе имаат можност да го покажат својот потенцијал.
Шампионската титула во ФФМ Детската лига е само уште една потврда дека во Јанг Тим се работи посветено, професионално и со јасна визија за создавање на идните фудбалски ѕвезди.
