РК Младост 1977 од Богданци влегува максимално подготвен во најважниот натпревар сезонава. Во пресрет на баражот за пласман во Супер лигата, клубот го засили својот играчки кадар со двајца искусни ракометари кои треба да донесат дополнителен квалитет и сигурност во клучниот меч за враќање меѓу македонската ракометна елита.
Нови членови на тимот се црногорскиот лев бек Богдан Николиќ и српскиот голман Живојин Илиќ, двајца ракометари со богато искуство, интернационални настапи и победнички менталитет.
Од клубот веруваат дека нивното присуство ќе биде значајно засилување во обидот да се оствари големата цел – пласман во Супер лигата.
Младост сезонава го освои второто место во Првата ракометна лига и преку бараж ќе има можност да обезбеди враќање во најсилното домашно натпреварување. Противник на тимот од Богданци ќе биде суперлигашот Струга.
Натпреварот се игра во среда во спортската сала „25 Мај“ во Радовиш со почеток од 19:30 часот, а интересот за овој дуел е огромен.
Во пресрет на натпреварот се мобилизира целото богданско поднебје. Освен од Богданци, поддршка за Младост се најавува и од Гевгелија, Валандово и Дојран, со цел салата во Радовиш да биде исполнета и тимот да ја има потребната поддршка во борбата за враќање во Супер лигата.
„Сега е моментот кога сите сме едно – играчите, стручниот штаб и нашата верна публика заедно во битката за Супер лига“, порачуваат од РК Младост 1977.
Среда носи голем ракометен спектакл во Радовиш, а Младост ќе се обиде со помош на своите навивачи да направи уште еден чекор и повторно да стане дел од суперлигашкото друштво.
