Охрид е во исчекување на големото финале од ЕХФ Европскиот куп против Татабања, а интересот за натпреварот е огромен. Салата „Билјанини Извори“ беше распродадена за рекордно кратко време, што е уште една потврда за ракометната еуфорија која владее во градот.
Во пресрет на историскиот дуел, градоначалникот Кирил Пецаков оствари средба со потпретседателот на Европската ракометна федерација, Предраг Бошковиќ. На состанокот се разговараше за актуелните случувања во европскиот ракомет, како и за значењето на финалниот натпревар што го очекува охридскиот тим.
Посебен акцент бил ставен на развојот на ракометот во Охрид и на визијата што градот и ГРК Охрид ја имаат за иднината. Притоа биле разгледани и можностите за понатамошен напредок и афирмација на клубот на меѓународната сцена.
Бошковиќ упатил честитки за досегашните резултати и за проектот што успешно се гради во Охрид, оценувајќи ги позитивно достигнувањата на клубот како на домашен, така и на европски план.
