ГРК Охрид в недела ќе го игра најважниот натпревар во својата историја. По победата од 29-28 на гостувањето во Унгарија, охриѓани ќе ја пречекаат МОЛ Татабања во реваншот од финалето на ЕХФ Европскиот Куп, со можност пред своите навивачи да стигнат до европскиот трофеј.
На денешната прес- конференција, голманот Кристијан Пилиповиќ изјави дека најважно за неговиот тим ќе биде да остане максимално фокусиран и дисциплиниран во текот на сите 60 минути. Според него, атмосферата во преполната сала може да биде голем адут за Охрид, но истовремено и дополнителна обврска играчите да одговорат на очекувањата на навивачите кои со месеци живеат за овој натпревар.
„Мислам дека мораме да бидеме сконцентрирани на нашите задачи, а и максимално фокусирани. Оваа сала и оваа публика треба да го добијат тоа што го заслужуваат. Еве, зборувајќи.. веќе се наежив. Таа поддршка ние треба да ја искористиме на вистински начин и да не изгориме во желбата. Сите едвај ја чекаме оваа средба. Јас верувам во нова победа. Ќе го дадеме максимумот за овој град и за овој клуб“, изјави Пилиповиќ.
Во „Билјанини извори“ нема да има празно место, а целиот град е подготвен за ракометен празник. Останува уште последниот чекор – заедно со навивачите, ракометарите на Охрид да се обидат да испишат историја и да го донесат европскиот пехар во Македонија.
