Кошаркарската федерација на Македонија ги дефинираше стручните штабови на младинските национални селекции кои ова лето ќе ја претставуваат државата на европската сцена.
Македонија ќе настапи на четири младински Европски првенства во машка и женска конкуренција, а покрај сениорскиот национален тим, европски предизвици ги очекуваат селекциите „Под 20“, „Под 18“ и „Под 16“ години во машка конкуренција, како и женската репрезентација „Под 18“ години.
За селектор на машката репрезентација „Под 20“ години е назначен Никола Велев, актуелен асистент во сениорската репрезентација на Македонија и во романскиот ЦСУ Тарговиште. Тој ќе ја предводи селекцијата на Европското првенство од Дивизијата „Б“ во Братислава, кое ќе се одржи од 10 до 19 јули.
Миодраг Тодоровиќ е нов селектор на машката репрезентација „Под 18“ години. Тренерот на Маџари ќе ја води јуниорската селекција на Европското првенство од Дивизијата „Б“, кое од 24 јули до 2 август ќе се игра во Ријека и Опатија.
Дејан Стојановски ќе биде на чело на машката репрезентација „Под 16“ години. Тренерот во младинските категории на германски Олденбург ќе ја предводи селекцијата на Европското првенство од Дивизијата „Б“, кое ова лето ќе се одржи во Скопје и Гевгелија, од 6 до 15 август.
Женската репрезентација „Под 18“ години ќе настапи на Европското првенство од Дивизијата „Б“ во романскиот град Тулчеа, кое ќе се игра од 31 јули до 9 август. Селекторската улога му е доверена на Виктор Петровски, тренерот на актуелниот шампион Крива Паланка.
Во рамки на развојниот проект на ФИБА, активностите продолжуваат и за двете селекции „Под 14“ години. Машката селекција ќе ја води Мартин Атанасовски од МКК Куманово, додека женската репрезентација ќе биде предводена од Никола Петровски од КК Петровски.
