Македонскиот младински репрезентативец Димитар Узунчев би можел кариерата да ја продолжи во словенечкиот гигант Целје. Според информациите, талентираниот десен бек е пред трансфер во поранешниот европски шампион, откако со своите настапи сезонава остави силен впечаток во домашниот шампионат.
Дваесетгодишниот ракометар настапуваше за Бутел Скопје и беше еден од позабележителните млади играчи на својата позиција. Со добрите партии го привлече вниманието на повеќе клубови, а најсериозен интерес покажал токму словенечкиот состав.
Узунчев, зад себе веќе има искуство во македонските клубови Алкалоид и Мулти Есенс, а редовно е дел и од младинските национални селекции на Македонија. Станува збор за ракометар кој важи за еден од најперспективните во својата генерација.
Доколку трансферот биде реализиран, тоа ќе претставува голем исчекор во кариерата на младиот бек, бидејќи Целје со години е клуб познат по развојот на таленти и настапите на највисоко европско ниво.
