Охрид е на чекор до историски успех во европските натпреварувања, откако во реванш- финалето од Европскиот куп на ЕХФ пред домашната публика ќе ја пречека унгарска Татабања. Македонскиот претставник во првиот натпревар во Унгарија успеа да слави со 28-29 и со минимална предност ќе влезе во битката за трофејот.
Во пресрет на решавачкиот дуел, ЕХФ ги одреди и официјалните лица за натпреварот во „Билјанини Извори“. Правдата на теренот ќе ја делат португалските арбитри Даниел Акото Мартинс и Роберто Акото Мартинс, додека делегатскиот тим ќе го сочинуваат Предраг Бошковиќ од Црна Гора и Јири Опава од Чешка.
Интересно е што браќата Мартинс беа предвидени и за минатогодишното реванш- финале во ЕХФ Купот меѓу Алкалоид и АЕК Атина во Скопје. Сепак, тој натпревар никогаш не се одигра, откако грчкиот тим одби да излезе на теренот.
Сега, охриѓани се надеваат дека токму пред своите навивачи ќе испишат нова страница во клупската историја и ќе стигнат до првиот европски трофеј.
