ГРК Охрид влегува во големото финале од ЕХФ Европскиот Куп, каде што ќе се соочи со унгарскиот тим Татабања.
Првото финално соочување е закажано за недела, 24 мај, со почеток во 17:00 часот, додека реваншот ќе се одигра на 31 мај од 20:00 часот. Токму тој втор натпревар ќе се игра во Охрид, во СРЦ „Билјанини извори“, каде се очекува целосно исполнети трибини и силна домашна поддршка.
Предност за охриѓани е што ќе го имаат финишот од битката за трофејот пред својата публика, но пред тоа ги очекува тежок испит на гостински терен, каде ќе мора да одиграат максимално дисциплинирано и според тактичкиот план.
ЕХФ веќе потврди дека првиот финален натпревар ќе биде емитуван низ повеќе европски земји, меѓу кои Данска, Шпанија, Норвешка, Германија и Полска, а ќе биде достапен и преку ЕХФ ТВ платформата.
Патот до финалето за Охрид беше импресивен. Во полуфиналето, по драматична завршница и подобро изведување пенали, беше елиминиран Целје. Претходно, во четвртфиналето беше подобар од Олимпијакос, додека во осминафиналето без поголеми проблеми ја мина Дукла Прага. Пред тоа, пак, во третото и второто коло, рутински беа совладани Слога Добој и Баку.
