Младиот фудбалски талент на Шкендија од Тетово, Аулон Куртиши, денес доживеа еден од најзначајните моменти во својата досегашна кариера, откако со тимот на Шкендија до 16 години (помлада пионерска Супер лига) освои шампионската титула во Суперлигата на Македонија.
Со многу труд, дисциплина и посветеност, 15-годишниот Куртиши сезонава уште еднаш го потврди својот огромен потенцијал и важеше за еден од најдобрите фудбалери во генерацијата на тетовскиот клуб.
Шкендија ја круниса одличната сезона со убедлива победа од 5:2 над Брегалница во решавачкиот натпревар, а доминацијата на тетовци најдобро ја покажува фактот што сезоната ја завршија со дури 14 бода предност во однос на второпласираниот тим на Македонија Ѓорче Петров.
Аулон своите први фудбалски чекори ги направил во клубот „Скендербеу“, каде работел под водство на тренерот Башким Бакиу. Благодарение на својот талент и напорната работа, подоцна се преселил во академијата на Шкендија, каде продолжил успешно да се развива и да напредува.
Тој најчесто настапува на позицијата десно крило, но подеднакво успешно може да игра и како централен напаѓач. Неговите добри партии, голови и континуирани настапи го привлекле вниманието и на тренерот Исмаил Исмаили, кој има голема доверба во неговиот потенцијал.
Иако веќе стигна до шампионска титула на младинско ниво, амбициите на Куртиши не завршуваат тука. Младиот тетовец сонува еден ден да заигра на највисоко европско ниво и да го подигне трофејот во Лигата на шампионите.
Во моментов продолжува професионално да работи и да се развива, а голема поддршка добива од своето семејство, како и од поранешните и сегашните тренери, кои веруваат дека станува збор за редок и исклучителен фудбалски талент.
За Аулон Куртиши оваа титула е само почеток на патот кон уште поголеми успеси во иднина.
Буран Муслиу, Спортска Мрежа
