Македонскиот шампион Еурофарм Пелистер продолжува со градењето на тимот за новата сезона, а ново име во редовите на битолскиот клуб е босанскиот интернационалец Едвин Џелиловиќ.
Станува збор за 23-годишно десно крило од Тузла, кое со Еурофарм Пелистер потпиша договор на три сезони и во Битола доаѓа со големи амбиции и очекувања.
Џелиловиќ зад себе има успешен период во дресот на Извиѓач, клуб со кој освои повеќе титули во шампионатот на Босна и Херцеговина, а претходно настапуваше и за Грачаница.
Младиот ракометар важи за еден од најперспективните играчи на својата позиција во регионот, а во изминатите сезони стекна и значајно европско искуство преку настапите во Европската лига и ЕХФ Европскиот Куп.
Новиот ракометар на „зелено-белите“ е висок 189 сантиметри и тежок 81 килограм, а од Еурофарм Пелистер веруваат дека неговиот талент, брзина и квалитет ќе донесат дополнителна енергија во тимот за сезоната 2026/27.
Официјалната промоција на Едвин Џелиловиќ како нов член на Еурофарм Пелистер ќе се одржи на стартот на подготовките за новата сезона во јули.
