Капитенот на Вардар, Гоце Георгиевски, и официјално го продолжи договорот со „црвено-црните“ и ќе остане во клубот и наредната сезона, по што ќе стави крај на својата богата и успешна ракометна кариера.
Искусниот десен бек, кој е дете на Металург, зад себе има импресивна интернационална кариера, настапувајќи за француски Тулуз и романски Букурешт, пред во сезоната 2020/21 да пристигне во Вардар.
Оттогаш Георгиевски претставува еден од најважните играчи во тимот и вистински лидер на теренот и во соблекувалната, а со капитенската лента стана симбол на борбеноста и вардаровиот дух.
Од РК Вардар истакнаа дека се горди што токму нивниот капитен ќе ја заврши кариерата во дресот на најтрофејниот македонски клуб, со надеж дека последната сезона ќе биде уште поуспешна од актуелната.
За Вардар и навивачите следува уште една сезона со еден од омилените ракометари во „црвено-црниот“ табор – последниот танц на Гоце Георгиевски.
