Селекторот на машката ракометна репрезентација на Македонија, Кирил Лазаров, го објави конечниот список на ракометари за бараж двомечот против Словачка, кој ќе решава за пласман на Светското првенство 2027.
На скратениот список се најдоа 20 ракометари, од кои Лазаров ќе ги избере 16-те што ќе настапат на двата натпревари. Во однос на претходните собири, најголемо внимание привлекува отсуството на искусниот пивот Жарко Пешевски, како и на голманот Иван Галевски. Надвор од комбинација останаа и Мартин Серафимов и Никола Костески.
Шанса како трет голман доби чуварот на мрежата на РК Вардар, Васил Гогов, додека на списокот се враќа и десниот бек на РК Охрид, Томи Јагуриновски.
Македонската репрезентација ќе се собере на 10 мај во хотелот „Александар Палас“ во Скопје, по што ќе следуваат подготовките за двомечот со Словачка.
Првиот натпревар ќе се игра на 14 мај во арената „Татран“ во Прешов со почеток од 19:00 часот, додека реваншот е закажан за 17 мај во СЦ „Борис Трајковски“ во Скопје.
Македонија ќе се обиде да обезбеди осмо последователно, односно вкупно десетто учество на едно Светско првенство.
