Претседателот на Македонскиот олимписки комитет (МОК), Даниел Димевски, вчера одржа официјална работна средба со претседателот на Олимпискиот комитет на Србија, Дејан Томашевиќ, посветена на унапредување на соработката и развојот на олимпискиот спорт во регионот.
Средбата се одржа во просториите на МОК во пријателска и конструктивна атмосфера, при што беа утврдени повеќе стратешки насоки за идно дејствување.
Главна тема на разговорите беше заедничкиот настап преку европската програма Еразмус+. Двете страни се договорија за здружување на капацитетите и заедничко учество во аплицирање и реализација на проекти, со цел поефикасно користење на ресурсите за развој на спортот, едукацијата и младинските спортски активности.
Посебен фокус беше ставен и на развојот и промоцијата на 3х3 кошарката, преку размена на искуства и креирање заеднички стратегии за нејзина поголема популаризација.
Исто така, беше најавена и идната соработка преку размена на стручен кадар и организирање заеднички подготовки на спортисти од двете земји.
Во рамки на посетата, Димевски го запозна својот српски колега со инфраструктурните капацитети на Олимпискиот спортски центар, при што гостите имаа можност да се информираат за условите за тренинг и развој, како и за современата лабораторија за мерење на спортски перформанси.
На крајот, двајцата претседатели заклучија дека постои значителен потенцијал за заедничко делување, кое во иднина може да придонесе за уште поголем развој на олимпиското движење во двете земји.
