На само три кола до крајот на шампионатот во Првата македонска фудбалска лига, Работнички сè уште ја води жестоката битка за опстанок и нема простор за нов кикс.
„Романтичарите“ денеска ги очекува тешко гостување кај АП Брера во Струмица, натпревар во кој единствена цел за скопскиот состав се трите бода.
Борбата за избегнување на опасната зона станува сè понеизвесна, а секој бод може да биде пресуден во финишот од сезоната. Работнички ќе мора да покаже карактер и стабилност токму во моментите кога притисокот е најголем.
„Целта се трите бода. Немаме право на грешка, фокусирани сме да победиме. На минатите два натпревари испуштивме многу значајни бодови и сега немаме друга алтернатива. Брера исто така е во загрозена зона, се работи за млад и квалитетен состав, но ние само со триумф ќе продолжиме да се надеваме дека можеме да обезбедиме опстанок“, изјави капитенот Бесир Демири.
Во пресрет на натпреварот од 31.коло, АП Брера се наоѓа на деветтата позиција со 36 бода, додека Работнички е на 11.место со 29 бода.
Натпреварот меѓу АП Брера и Работнички стартува од 16 часот, на стадионот „Благој Истатов“ во Струмица.
