На две кола до крајот на сезоната во Првата македонска фудбалска лига, Арсими и Башкими ќе водат директна пресметка која може да биде клучна во битката за опстанок.
„Златните“ бодови се во игра, а влогот е огромен за двата тима кои сакаат и следната сезона да останат дел од елитното друштво.
Домашниот состав на Арсими влегува во дуелот во добра форма, со освоени 10 бодови на последните пет натпревари, додека Башкими дополнително ја крена самодовербата по големата победа над Шкендија.
Кумановскиот тим гостува во Гостивар со јасна цел – да обезбеди сигурен опстанок и да направи голем чекор кон исполнување на сезонската задача.
„Ова е многу важен натпревар за двете екипи. Арсими бара бодови за бегство од зоната на баражот, додека Башкими сака крај на сезоната без грижи. Ние сме екипи кои меѓусебно се почитуваат, но во текот на тие 90 минути секој ќе се бори за ‘златните’ три бода,“ изјави Реџеп Мурати.
Според него, притисокот е на страната на домаќинот, што може да биде предност за кумановци.
„Се надевам дека од Гостивар ќе се вратиме со победа и успешно ќе ја запечатиме нашата прва сезона во Првата македонска фудбалска лига (ПМФЛ). Верувам дека притисокот врз домаќините ќе биде наша предност,“ додаде Мурати.
Во досегашните 10 меѓусебни пресметки меѓу овие две екипи, Арсими забележал 5 победи, 2 натпревари завршиле нерешено, додека Башкими триумфирал 3 пати.
Натпреварот помеѓу Арсими и Башкими ќе се одигра на стадионот во Гостивар, со почеток во 16:00 часот.
