Градот под Исарот и оваа година ќе биде домаќин на вистински спортски спектакл. В недела (10 мај), на стадионот на ФК Кежовица, ќе се одржи второто издание на меѓународниот турнир во пеливанско борење „Трофеј Штип“, настан кој веќе се етаблира како еден од најзначајните турнири од ваков тип во регионот.
По успешното прво издание минатата година, интересот за турнирот е значително зголемен, а организаторите најавуваат уште подобра организација и поквалитетна конкуренција. Покрај натпреварувачи од Македонија, на турнирот ќе настапат и пеливани од Грција, Албанија, Бугарија, Србија, Турција и Косово, што уште еднаш му дава силен меѓународен карактер на настанот.
Пеливанското борење, кое е специфичен и атрактивен спорт близок до борењето во слободен стил, последниве години привлекува сè поголемо внимание кај младите, но и кај спортската публика во Источна Македонија. Токму ваквите турнири придонесуваат за популаризација на овој традиционален спорт и создавање нови генерации натпреварувачи.
„На 10 мај со почеток во 12 часот на стадионот на ФК Кежовица, по вторпат ќе се одржи турнирот во пеливанско борење „Трофеј Штип“. Сакам да ги повикам сите љубители на спортот особено љубителите на пеливанското борење, да уживаат во вештините на пеливаните кои ќе учествуваат на второто издание на „Трофеј Штип“. Годинава организацијата е на повисоко ниво, поучени од минатата година. Морам да потенцирам дека интересот за пеливанството во нашиот град е на високо ниво, а масовноста е голема. Многу млади покажуваат интерес кон овој спорт бидејќи се работи за несекојдневен спорт, па тоа е причина плус за да има голем интерес како кај натпреварувачите така и кај публиката, која сака да следи вакви борби“, вели организаторот на „Трофеј Штип“, Дејан Митров за Спортска Мрежа.
Турнирот ќе започне во 12 часот, а стадионот на ФК Кежовица се наоѓа на влезот во Штип од правец на Радовиш, веднаш до бања Кежовица, што ќе овозможи лесен пристап и за посетителите кои доаѓаат од други градови и држави.
Со ваков број учесници и растечки интерес, „Трофеј Штип“ продолжува да расте и да го зацврстува своето место меѓу најзначајните настани во пеливанското борење во регионот.
