Ракометарите на Еурофарм Пелистер со убедлив триумф над Бутел Скопје од 38:28 успешно реагираа по поразот во големото дерби против Вардар и повторно се вратија на победничките патеки во македонската Суперлига.
Само еден ден по дуелот во Скопје, битолчани повторно излегоа на терен, но и покрај заморот и ротациите во составот, избраниците на тренерот Алексо Лембанов одиграа сигурен натпревар во Спортска сала „Боро Чурлевски“.
Домашниот тим уште од стартот го наметна својот ритам и брзо создаде предност од 5:2. Иако Бутел накратко се доближи на 5:4, Пелистер веднаш возврати со нов налет и постепено почна да ја зголемува разликата. Во еден период резултатот беше 10:5, а до крајот на првото полувреме битолчани целосно ја презедоа контролата и на паузата заминаа со убедливи 22:12.
Во второто полувреме Пелистер рутински ја одржуваше високата предност, не дозволувајќи му на гостинскиот состав да се врати резултатски во натпреварот. Разликата во одредени моменти достигна и максимални 14 гола, а конечниот резултат беше 38:28.
Најефикасни кај победничкиот тим беа капитенот Филип Кузмановски и Петар Атанасијевиќ со по осум погодоци, додека кај Бутел најрасположен беше Тодор Узунчев, кој исто така постигна осум гола.
Во рамки на осмото коло од плеј-аут фазата, Пролет славеше против Радовиш со 37:29.
