Ќе решава „мајсторката“: Работнички Скопје го надигра Наковски Волеј и израмни на 2-2 во финалето

Пред својата публика во Спортски центар „Борис Трајковски“, скопскиот состав славеше со 25:15, 27:25 и 27:25 и успеа да израмни на 2-2 во победи, со што финалната серија добива драматична завршница.

Како и во претходните натпревари, и овој дуел донесе квалитетна и борбена одбојка, а најголема неизвесност имаше во вториот и третиот сет, каде двете екипи водеа жестока битка за секој поен.

До првата максимална победа сезонава против Наковски Волеј, Работнички Скопје беше предводен од Тамара Стојанова и Антонија Баталаковска, кои постигнаа по 12 поени, додека Андротеа Милевска додаде 11 поени.

Во редовите на Наковски Волеј, Сара Марковиќ беше најефикасна со девет поени, Ивана Милева запиша осум, а Мила Долдурова и Ива Стојковска реализираа по шест поени.

Решавачкиот петти натпревар, кој ќе го даде новиот шампион, е закажан за в понеделник од 18 часот во Струмица.