Убедлива победа од 3:0 забележа екипата на Тиверија Брера која на домашен терен во Струмица славеше над Каменица Саса во рамки на 23. коло на Првата женска фудбалска лига.
Домаќините на полувреме имаа два гола предност, откако Билјана Панеска во 6. минута го отвори резултатот за водство од 1:0, а во 31. минута Розита Пецева постигна гол за двојна предност на полувреме.
Во вториот дел Панеска со втор гол ги постави конечните 3:0 со што Тиверија Брера се зацврсти на второто место.
Дербито во Пржино меѓу Истатов и Љуботен заврши без победник, но и без погодоци (0:0) со што двете екипи ги поделија бодовите и мораа да се задоволат со по еден бод.
Во Струга исто така немаше победник, беа постигна два гола за делба на бодовите меѓу Ас Јунајтед и Речица откако одиграа 1:1. Домаќинот преку Јована Павловска во 40. минута го отвори резултатот за 1:0 на полувреме. Во вториот дел Лана Спасовска во 79. минута беше прецизна за конечни 1:1.
Вардар преку пресврт го доби Кочани за домашна победа од 4:1. Искусната Катерина Милеска во 14. минута го донесе гостинот во водство од 0:1, но радоста траеше десет минути кога Љубица Асановиќ постигна гол за 1:1. До крајот на првиот дел вардарки успеаја да го свртат резултатот на 2:1 со гол на Мила Наумовска.
Во вториот дел во 65. минута Наумовска со втор гол зголеми на 3:1, а печат на високата победа стави Михаела Марковска која во 79. минута беше прецизна за конечни 4:1.
Претходно како што објави Спортска Мрежа, Скопје славеше убедливо над Топ Гол и стана официјално шампион во ПЖФЛ на четири кола до крајот. Извештајот на Спортска Мрежа од тој меч е достапен овде.
Шампионот Скопје е на врвот со 66 бодови, втор е составот на Тиверија Брера со 51 бод, Истатов е трет со 46 бодови, Љуботен е четврти со 44 бодови. На петтото место е Каменица Саса со 37 бодови, Ас Јунајтед е шести со 35 бодови.
Екипата на Вардар е седма со 19 бодови, Речица е осма со 13 бодови, а трката за опстанок преку бараж ја водат Кочани кој е претпоследен со седум бодови и Топ Гол кој е на дното со четири бодови.
